AIIMS-ah dan pangngaiin Hna an thawk leh tawh

New Delhi-a All India Institute of Medical Sciences (AIIMS)-ah Inrinni zan khan kangmei a chhuak a, damlote pawh venthawn thilah sawnchhuah an ni. Mahse nimin khan damdawi-in hi dan pangngai anga kalpui a ni  leh tawh a, damlote pawh an ward-ah dah luh leh vek an ni tawh tih hospital thuneitute chuan an sawi. 

Union health minister Harsh Vardhan chuan nimin khan hospital-a thil thleng chungchang hi thuneitute a sawipui. AIIMS thuneitute pawh­in thil thlen dan chu chhui chian a nih tur thu leh, invenhimna lam pawh ṭha zawka thuam a ni dawn tih an sawi a ni. 

Kangmei hi hospital microbiology laboratory area aṭanga chhuak a ni a, laboratory leh office area-te a kang hman a ni. Mahse AIIMS thu­chhuah chuan kangmei hian damlote awmna hmun a thleng lo a, venthawn thilah AB wing-a damlote chu area dangah sawnchhuah an ni a, mahse nimin khan an ward ngaiah sawn let an ni leh tawh a ni, a ti. 

Hospital-a emergency department leh emer­gency laboratory-te pawh nimin khan dan pangngaiin hna an thawk leh tawh tih a sawi bawk. Hospital thuchhuah chuan, "AIIMS hian fire prevention system ṭha tak a nei a, kangṭhelhtute pawh dah reng niin, hmanruate pawh endik an ni fo a ni. Staff-te zingah pawh fire-fighting system lam inzirtirna neih ṭhin a ni bawk," a ti. AIIMS director chuan department hrang hranga hotu leh administrative stafft-e chu meeting a neihpui nghal bawk a ni.