India leh Bhutan-in thawhdunna tur 10 ziak

India leh Bhutan chuan kar kal ta Inrinni khan sector hrang hranga ram pahnihte thawhdunna tur, Memorandum of Understanding (MoU) 10 an ziak. 

Prime minister Narendra Modi chu Bhutan ramah hian zinin, Bhutan prime minister Lotay Tshering nen Inrinni khan inremna hi an ziak a, thawhdunna ṭha leh zau zawk neih dan turte an sawi dun. Hemi hnu hian MoU 10 hi ziah a ni. Inremna an ziah zingah hian space research, aviation, information technology, power leh education lama thawhdunna tur a ni a, South Asia Satellite hmanna tura Thimpu-a SATCOM Network dinna tur pawh a tel a ni. 

Narendra Modi hi Bhutan rama a zin ṭum hnihna a ni a, kumin May thlaa NDA sorkar term hnihna lakluh a nih hnuah Bhutan a tlawhna hmasa ber a ni. Inrinni khan PM hian 740 MW Mangdechhu hydroelectric power plant a hawng a, hydropower lama ram pahnihte kum 50 zet an thawhdunna hriatrenga puala stamp siam pawh a tlangzarh nghal bawk. 

Modi chuan Bhutan chu India ram ṭhianṭha tak a ni tih sawiin, ram pahnihten inlaichinna ṭha leh thuk tak an neih reng thu a sawi a, project dang thawhdun leh zel pawh a nghakhlel hle tih a sawi. India-in Bhutan hnena LPG a supply, thla khata MT 700 chu MT 1000 a tihpun a ni dawn tih a sawi bawk.