BJP MP-in JNU hming thlak a rawt PM Modi hming chawia thlak a duh

Bharatiya Janata Party (BJP) MP leh singer Hans Raj Hans chuan Jawaharlal Nehru University (JNU) hming chu prime minister Narendra Modi hming chawia thlak a rawt. 

BJP MP hian BJP zirlai pawl, Akhil Bharatiya Vidyarthi Parishad (ABVP)-in JNU-a ram tana nunna hlantu sipaite hriatrengna hun an buatsaihah a telpui a, he hunah hian Indian Constitution Article 370 ṭhiah chungchang pawh sawiho a ni bawk. Sawihonaah Hans chuan thlahtute thil lo tihsual ram mipuite an tuar mek a ni tiin, zirlai kalkhawmte hnenah JNU-a 'J' tih chu eng tihna nge tih a zawt zui a, kalkhawmte an nui a ring hle. 

Hemi hnu hian BJP MP chuan JNU hming chu PM Modi-a hnathawh ṭhatte chawimawina atan, Modi hming chawiin, Modi Narendra University (MNU) tia thlak a rawt zui a ni. Sorkar laipuiin Article 370 a tihtawp chungchangah pawh Modi chu fak zuiin, thil tih theih loh nia ngaihte chuan PM Modi chuan a takin a ti thei zel a ni, a ti. 

Jawaharlal Nehru Uni­versity hi kum 1969-a din a ni a, India prime minister hmasa ber Pandit Jawaharlal Nehru hming chawia sak a ni.