New Delhi leh Islamabad-in inbiakna an nei a nih chuan PoK chungchangah chiah a ni ang: Rajnath Singh

Union defence minister Rajnath Singh chuan Pathianni khan New Delhi leh Islamabad-in inbiakna an nei dawn a nih chuan Pakistan-occupied Kashmir (PoK) chungchangah chiah a ni ang, a ti.

Nimin khan Kalka, Haryana-ah BJP-te chuan rally an nei a, hetah hian Rajnath Singh hian ‘Jan Ashirwad Yatra’ chu a hawng a ni. He hunah hian thu sawiin, Article 370 chuan Jammu and Kashmir hmasawnna tur a dang tih a sawi nawn leh. "Kan ṭhenawm ramte hian 'international community' kawngka kikin, India-in thil an tisual a ni an ti. Firfiaka chetna an thlawpna an titawp a nih chauhin Pakistan chu inbiakna neihpui an ni ang," tiin a sawi.

Rajnath hian tunhnaiah thu sawizui hlawh tak tak a sawichhuak zeuh zeuh a, Zirtawpni pawh khan nuclear ralthuam hman chungchanga India policy 'nuclear ralthuam hman hmasak loh' tih chu thil thlen dan azirin a inthlak mai thei tih a lo sawi tawh bawk a, he a thusawi hian sawizui a hlawh hle bawk. 

Hetihlai hian Pakistan lam hian India thutlukna hi an dem hle a, Pakistan prime minister Imran Khan pawhin vawi tam tak a demna thu a sawichhuak tawh a ni.