Ayodhya thubuai 1934 aṭang khan Muslim-te luh phalsak an ni lo: Nirmohi Akhara

Supreme Court-in thutlukna a lo siam tawh angin nimin aṭang khan Ayodhya-a Ram Janmabhoomi-Babri Masjid ram inchuh thubuaia day-to-day hearing chu neih ṭan a ni.

Hearing hi chief justice Ranjan Gogoi kaihhruai bench, judge panga awmna chuan a nei a, Nirmohi Akhara chuan Muslim-te chu 1934 aṭang khan Ayodhya-a structure inchuhah hian an luh phalsak an ni tawh lo tih an sawi a, ram pum acre 2.77 zeta zau chu an thuneihna hnuaia dah an phut.

Nirmohi Akhara aiawha inlan senior advocate Sushil Jain  chuan Ram Janmasthan leh inner courtyard chu kum za chuang Nirmohi Akhara kutah a awm tawh tih sawiin, Outer courtyard- ‘Sita Rasoi’, ‘Chabutra’ leh ‘Bhandar Grah’ awmnate chu an kuta awm a nih thu leh ram inchuh zingah an tel ngai lo tih a sawi.

Muslim party aiawh hian Advocate Rajeev Dhavan a inlan ve thung. Court hian hearing hi a la neih chhunzawm zel dawn a ni. Ayodhya ram inchuh buaina chungchanga member pathum awmna panel-in inremna kawng zawnga a hmalakna chu a hlawhchham avangin hearing hi nimin aṭanga neih ṭan tura tih kha a ni a, chief justice bakah hian SA Bobde, DY Chandrachud, Ashok Bhushan leh S Abdul Nazeer-te chu bench-ah hian an ṭhu.

CJI chuan hearing hi ni 100 chhung neih tura tih a nih thu a lo sawi tawh a, November 17-ah thutlukna siam an tum a ni.