Unnao pawngsual tawktu dinhmun a ṭha lo: AIIMS

Unnao-a pawngsual tawktu AIIMS  Trauma Centre-a dah mek chu a dinhmun a ṭha lo hle a, life support system pek mek a ni tih damdawi-in chuan a sawi.

Pawngsual tawktu lawyer pawh hi nimin khan Trauma Centre-ah hian dah luh a ni ve bawk a, pawngsual tawktu tak hi chu ICU-ah enkawl mek a ni. Unnao-a pawngsual tawktu leh a lawyer hi kar hmasa khan car-a an chuang lai chu truck-in a su a, Lucknow-ah enkawl an nih hnuah Thawhṭanni khan Supreme Court thupek angin New Delhi panpui a ni.Kar hmasaa accident an tawhnaah hian pawngsual tawktu chhungte pahnih chu  an thi a ni.

He thil thleng chhuitu Central Bureau of Investigation (CBI) chuan kar hmasaa accident thleng kaihhnawihah hian mi 10 an man tawh a, heng zingah hian Uttar Pradesh MLA Kuldeep Singh Sengar pawh a tel.