Kum 2022-ah mitinin in an nei vek ang: Rajnath Singh
Union Defence Minister Rajnath Singh chuan kar liam ta Inrinni khan sorkar laipui hmalaknain, kum 2022-ah chuan India rama mipui chengten chenna in an neih vek tawh tur thu a sawi.
Heng bakah hian kum 2024-ah chuan in tinah tui herh haw theihna a awm vek tur thu Singh chuan a sawi bawk. Singh chuan mitin hnenah inenkawlna atan sorkar laipui chuan cheng nuai 5 thlenga a ṭanpui theih thu a sawi.
Singh hi kar liam ta Inrinni khan Lucknow-ah BJP worker hnathawh ṭhat lawmpuina inkhawmah telin, BJP sorkar hmalak dan turte a sawi a ni.
Singh chuan kumin Lok Sabha inthlanpuia hnehna an chan theih chhan chu party worker-te thawhrim vang a nih thu sawiin, seat 303 lai an lak theihna chhan chu term hmasaa prime minister Narendra Modi hmalakna ṭhat vang a nih thu a sawi bawk.
He hunah hian Pakistan chungchang pawh sawi langin, Singh chuan Pakistan chu hel siam chhuaktuah puhin, "Khawi hmunah pawh helte chu industry ang hiala an lo len tawh chuan midang sumdawnnate chu khar a ngai ṭhin a ni," tiin Singh chuan Pakistan chu deusawh takin a ṭawngkhum.
Singh chuan defence lamah industry tam tak hawn belh tur a nih thu a sawi a, heng hian hna thar tam tak a siam belh tur thu a sawi bawk. He hunah hian BJP MP Ashok Bajpai, leh MLA Dr Neeraj Bora chuan Singh hi an ṭawiawm a ni.