Mann Ki Baat : PM-in Ayodhya thu rem dan pawm vangin mipui hnenah lawmthu a sawi

Prime minister Narendra Modi chuan nimin khan thla tina a tih ṭhin angin, a radio programme Mann Ki Baat hun hmang lehin ramchhung mipuite chu inlungruala Ayodhya thubuai remna an pawm avangin lawmthu a hrilh.

"Muanna leh inpumkhat­na  hlutnate chu ram chhungah a la pawimawh reng a ni. Ram Mandir thu­buai remna puan a nih khan, rampum chuan thinlung takin a pawm nghal a, lungrual takin mipuiten an pawm nghal a ni," a ti. 

Hunrei tak chhung dikna zawnna chu tihtawp a ni ta a, he thuremna hi kan judiciary history inthlakna hmun a ni, tia sawiin Supreme Court-in thu a rem hnu khan beiseina leh hriatthiamna thar nen kan ram chuan hmalam a pan a ni, ti bawk. 

Ramchhungah ṭawng hrang hrang hmang an awm thu sawi bawkin, Uttarakhand-a Dharchula mipui tlemtein an ṭawng leh an hnam tihdan phung hum tura an beihna chungchang a sawilang a ni. "Civilization, hnam tihdan phung leh ṭawng hrang hrang awmte hian danglam tak chunga kan inpumkhatna khaw­vel pumah a lantir a ni, a ti.

Zirlaiten Pariksha pe Charcha’ event chungchanga an zawhna chhang nghalin, nakkum January velah neih a ni mai thei tih a sawi. Feed­back an dawn ṭhat dan azirin January-ah chuan buatsaih tum a ni tih a sawi a ni.