SC-in Maha sorkar fiah nghal tura phutna hnawl Maha CM hnenah lehkha thehlut turin hriattir

Maharashtra-ah Shiv Sena, Nationalist Congress Party (NCP) leh Congress party-ten ṭangrual sorkar siam tuma an inbuatsaih laiin, kar liam ta Inrinni zing khan sawi lawk loin Bharatya Janata Party (BJP) kaihhruai sorkar chu Governor Bhagat Singh Koshiyar chuan hmanhmawh takin a lalut a, hei hian sawi zui a hlawh hle. 

Governor Koshiyar chuan BJP hruaitu Devendra Fadnavis chu chief minister atan lalutin, Shiv Sena MLA Ajit Pawar chu deputy chief minister atan a lalut. Maharashtra assembly, seat 288 awmah BJP hian seat 105 neiin, Shiv Sena-in seat 56, NCP-in 54 leh Congress-in seat 44 an nei. Sorkar siam tur hian thlawptu MLA 155 an neih tlin a ngai a ni. BJP hian Shiv Sena MLA-ten an thlawp nia an sawi chu NCP hotu, Sharad Pawar chuan thu dik lo a nih thu sawiin, an party MLA hel tlemte chauhin BJP hi an thlawp tih a sawi. Inrinni tlai khan NCP MLA te chuan meeting nei nghalin, hetah hian MLA 50 an tel a, Ajit Paward chu legislature party leader a nihna pawh an hlihsak nghal tih Sharad Pawar chuan a sawi. 

BJP kaihhruai sorkar siam a nih danah Shiv Sena, NCP leh Congress party chuan Supreme Court-ah petition thehlutin, chief minister Fadnavis kaihhruai sorkar chuan sorkar siam turin MLA thlawptu a ngah tawk em tih fiah an phut. 

Supreme Court chuan nimin khan party pathumte petition thehluh hi ngaihtuah nghalin, floor test neih an phutna chu a dang rih. Hemi rual hian CM Fadnavis chu sorkar siam turin thlawptu a ngah tawk tih leh, Governor-in sorkar siam tura a sawmna lehkha te chu court-ah vawiin dar 10.30 hma ngeiin thehlut turin a ti. 

BJP chuan court-in lehkha thehlut tura a tih chungchangah, hun pek belh turin ngen mah se an ngenna hi Supreme Court chuan a hnawlsak. Nimina party pathumte petition thehluh, court-in a ngaihtuahnaa Shiv Sena aiawh, union minister hlui leh senior advocate Kapil Silbal chuan Governor thiltih dan chu ram phatsannaah a ngaih thu a sawi. Sorkar siam thei nia BJP a insawi chungchangah a fiahna tur  pawh engmah a dil lo a ni,  a ti. BJP kaihhruai sorkar thar chu House-ah fiah nghal an phut tih an sawi. 

Party pathum aiawhte chuan Governor hian sorkar siam tura a sawm hmain Fadnavis thusawite hi a fiah phawt tur a ni tiin; Shiv Sena, NCP leh Congress thawkhoin  MLA 154 nei a, ṭangrual sorkar siam tuma an inbuatsaih lai mekah Governor-in hetianga thutlukna a siam mai chu hriatthiam a har an tih thu an sawi. Maharashtra Governor chetdan chu Governor office zahawmna tichhia leh nuihzatbura siamah an puh. 

Hetihlai hian Fadnavis hian MLA 170 chuang thlawptu a nei nia sawiin, Governor chuan House-a floor test nei turin sorkar thar hi November 30 thleng hun a pe niin BJP leader Ashish Shelar chuan a sawi. House-ah fiahna hi a paltlang ngei dawn a, BJP kaihhruai sorkar nghet leh chak tak a ding dawn a ni, a ti.