ED-in forex bawhchhiaa puh MP thu zawhfiah turin ko

Enforcement Directorate (ED) chuan Rajya Sabha MP leh Chandigarh University Chancellor Satnam Singh Sandhu chu a company-in sum a dawn danah foreign exchange bawhchhiaah puhin, thu zawhfiah turin a ko.

Kum 57 mi, Sandhu-a company hian mipui sum an lakkhawm tam tak tichingpentua puh, 'Cloud Particle Scam' kalpuitu chhui chian mek,Vuenow Group hnuaia company-te hnen aṭangin sum a dawng nia puh a ni. ED chuan sum an thawnna chhan zawhfiah turin Sandh hi an ko a, sum tihchingpen chungchangah erawh inhnamhnawihna a nei lo nia sawi a ni. Sandhu hi November 12 khan koh a ni tawh a, mahse, a inlan lo. Hemi hnu hian November 25-ah ED Jalandhar Zonal Office-a inlan tura koh a ni leh a ni. Sandhu hian kum 2001 khan Chandigarh Group of Colleges (CGC) a din a, 2012-ah Chandigarh University a din leh a ni. Hei bakah NGO, Indian Minorities Foundation tih a din bawk.

ED hian Vuenow Group-in sum tam tak an tihchingpen kaihhnawihah Vuenow Group CEO leh founder Sukhwinder Singh Kharour leh a nupui, Dimple Kharour te chu an man tawh bawk. Company-in investor-te sum a lakkhawm a tihchinpen sak hi Rs vbc 3,700 vel nia sawi a ni. Kum 2024 aṭang khan Prevention of Money Laundering Act leh Foreign Exchange Management Act hnuaiah Vuenow Group hi chhui ṭan an ni. An sum lakkhawm aṭang hian Rs vbc 1,800 chu investor-te hnenah an pe kir a, a bak hi sumdawnna dang kalpuina atan an hmang nia sawi a ni.