
Vawiinah PM-in Rs vbc 60,000 senna project hawng dawn
Prime minister Narendra Modi chuan vawiin, Inrinni hian Bihar tlawhin, department 21 te siam project 103, Rs vbc 60,000 chuang investment tihna hawngin, lungphum a phum bawk ang.
PM Modi hian Vaishali district a tlawh hmasa ber dawn a, hetah hian six-lane Kachchi Dargah-Bidupur lei dawh, Nitish Setu a hawng dawn a ni. Patna chhim lama Kachhi Dargah leh Vaishali hmar lam Bidupur thlunzawmtu, ramchhunga kawng thui ber zinga mi, six-lane lei dawh hi km 19.76-a thui a ni a, km 9.76-a thui lei leh km 10-a thui kawng a huam bawk. He lei dawh hian Patna leh North Bihar inkara veivah hun chhung a tihtlem dawn bakah, bungrua leh veivakte tan awlsamna a thlen dawn a ni. He lei dawh hian sumdawnna, transport, eizawnna a tihphuisui phah dawn bawk a ni. Vaishali-a Rajapakar-a public meeting-ah thu a sawi dawn bawk a, project eng emaw zat a hawng nghal dawn bawk.
Bihar-a project 103 siam zingah hian vantlang mipui tana ruahmante an tel a, hmalakna hrang hrang lungphum a phum bawk ang. Heng project-te hi sorkar department 21 hnuaia siam niin, hna thawhna atan Rs vbc 60,000 chuang sen a ni dawn a ni. Asian Development Bank (ADB) aṭangin sum lama puihbawmna USD mtd 450.84 dawn a ni a, bank leh state sorkar chuan 66:34 ratio a tum dawn a ni.
PM chuan industrial park leh Jafarpatti-a corridor sakna tur lungphum a phum bawk ang. Park hi ram acre 1,243 a zauah siam ani dawn a, electronic park pawh a huam tel dawn a ni. Hemi hmang hian industry lamah investment tam tak an hip luh a, ṭhalai tan hna tam tak siam theih an beisei.