Vawiinah SCO Civilisational Dialogue Forum ṭan dawn

Shanghai Cooperation Organisation (SCO) Civilisational Dialogue Forum hmasa ber tur chu vawiinah Purana Quila, New Delhi-ah ṭan a ni dawn a, November 22 thleng a awh ang. Prime minister Narendra Modi chuan hun hman tur hi a hawng dawn a ni.

Kum 2025-a Tianjin-a SCO Heads of State Summit neihah khan PM Modi chuan member ram mipuite inzawmna nghet zawk siam a, an ram art, literature leh tradition-te zau leh thuk zawka an inhrilh leh hriat tawn tir theihna turin Civilisation Dialogue Forum siam hi a rawt a ni a, a hnuah SCO framework hnuaiah duan a ni ta a ni.

Civilisational Dialogue Forum-ah hian SCO member ram 10 - China, Kazakhstan, Kyrgyzstan, Russia, Tajikistan, Uzbekistan, India, Pakistan, Iran leh Belarus culture minister-te bakah palai dangte an tel dawn a ni. Ministry of Culture leh External Affairs Ministry chuan dialogue hi an huaihawt dawn a ni. Dialogue neihna tur, Purana Quila (Old Fort) hi kum zabi 16 hunlaia emperor Humayun-a din a ni. He fort-ah India hmanlai thil hlui tam tak, kum 3,000 dawn liam taa mite pho lan a ni a, heng zingah hian pre-Mauryan, Mauryan, Sunga, Kushana, Gupta, post-Gupta leh mediaval era Rajput, Sultanate leh Mughal hunlaia mite an tel.