Delhi Court-in Sonia Gandhi chungchangah ATR ziak lut turin police hriattir

Delhi court chuan nimin khan Delhi police-te hnenah, Congress party hruaitu Sonia Gandhi laka mi pakhatin complaint a theh luh chungchangah action taken report (ATR) ziak lut turin a hriattir. Complaint theh luttu hian Sonia Gandhi hi India khua leh tui nihna pek a nih hma, kum 1980 khan electoral roll-ah a hming ziah luh a ni tawh niin a sawi.

Sonia Gandhi laka complaint hi Vikas Tripathi theh luh a ni a, kum 2025 khan a additional chief judicial magistrate (ACMM) Vabhav Chaurasiya chuan a complaint hi a lo hnawlsak tawh a ni. Mahse, Tripathi hian Sessions Court-ah theh lut nawn lehin, kumin September 21 khan Sessions Court chuan ACMM thupek hi a hnawlsak a, magistrate hnenah a ngaihtuah ṭhat sak turin a ti a ni. Delhi court-a Additional chief judicial magistrate (ACJM) Vinod Joshi chuan nimin khan police-te chu ATR theh lut tura tiin, November 27-a hearing neih tura tih a ni ta a ni.

Tripathi chuan Sonia Gandhi kum 1983, April 30-ah India khua leh tui nihna pek a ni a; mahse, hemi hma 1980 khan electoral roll-ah a hming a chuang tawh niin a sawi. Hei hi inbumna, dik lo taka thiltihna a ni, a ti. 1982-ah roll aṭangin Gandhi hming hi paih a ni a, a hnu kum 1983, January 1-ah dah luh leh a nih thu a sawi.

Hetih lai hian Gandhi chuan he puhna hi a pha a, he thubuai hi "ngaihdan dik lo tawp, thil ho mai mai, politics thila inchirhthehna leh dan kalhmang hman sualna" tiin a sawi. A laka complaint theh luh chu rinthu leh media report behchhana siam, a finfiahna tur document eng mah pawh a awm lo tih a sawi.