New Delhi-ah CAG kum 166 tlin lawm

Comptroller and Auditor General (CAG) of India kum 166-na chu Thawhṭanni khan New Delhi-a Bharat Mandapam Convention Centre-ah lawm a ni. Lawmna hun hman hi CAG K Sanjay Murthy chuan kaihruaiin, CAG lo ni tawhte pawhin he hun hi an hmanpui.

Murthy chuan technology hmanga inthlak danglamna, data-based auditing leh tualchhung inrelbawlna chak zawka kalpui a pawimawh thu a sawi. Department-in kum liam ta khan sorkar laipui audit report 40 leh, state sorkar audit report 174 a theh lut tawh tih sawiin, rawtna 3,742 siam a ni, a ti. Heng rawtna hi hmun thuma ṭhena hmun khat vel chu sorkar leh audited entity-ten an pawm bawk.

CAG chuan department-in unit 34,000 chuang audit in, inspection report 27,000 chuang a pe chhuak a, account 8,793 enfiah niin audit certificate 5,852 a pe chhuak bawk a ni.

Murthy chuan kum thum aṭanga kum li chhungin tui supply, sanitation, housing leh municipal finance audit neih tum a nih thu a sawi a, state autonomous pawl hrang hrangte sum leh pai enkawl dan chungchang ngaih pawimawh a nih thu a sawi. Department chuan auditing lamah digital platform leh artificial intelligence hmanna huang a zauh bawk.