PM Modi ASEAN Summit-ah a tel

Prime minister Narendra Modi chu nimina Philippines khawpui, Manila-a 23rd ASEAN-India Summit leh 21st East Asia Summit neihah a tel. Meeting kar lakah kum 2024 hnua a vawi khatna tuirn Quad summit an nei bawk.

Prime Minister chuan India leh ASEAN nena inzawmna nghet tak, Comprehensive Strategic Partnership a neih a ngaih pawimawh zia a sawi lang. ASEAN leh India chu an bial chhung leh pawn lamah remna leh muanna, boruak ngelnghet leh inrinngamna a awm theihna tura an thawh dun a ṭul thute a sawi. India chuan Indo-Pacific bialah boruak zalen leh inhawng tak, huapzo leh dan hmanga inrelbawlna ṭha a awm a duh thu sawiin, he bial hmalam hun hi inelna ni loin thawh honaah a innghat a ni, a ti.

Kum 2027 chu India-ASEAN inzawmna siam kum 35-na leh Comprehensive Strategic Partnership an siam kum 5-na tur a nih avangin kum pawimawh bik tak a ni tih a sawi bawk. India leh ASEAN inzawmna leh thawh hona ngheh lehzualna tura rawtna hrang hrang a neihte pawh a sawilang a ni.

PM Modi ASEAN Summit-ah a tel

Prime minister Narendra Modi chuan nimin vek khan summit neih kar lakah Manila-a gurudwara upa ber tlawhin, a sakṭhatna tur lungphum a phum nghal bawk. Khalsa Diwan Gurudwara hi kum 100 chuang a ni tawh.

Gurudwara hi kum 1901 khan din a ni a, kum 1903-ah hman ṭan a ni. Kum 1924 khan Khalsa Diwan tiha ziah luh a ni. Khalsa Diwan Gurudwara hi Philipinnes-a Gurudwara upa ber a ni a; Manila-a Sikh leh community dangte tana hnam ziarang, sakhuana, midangte ṭanpui duhna kaihhnawihah hmun pawimawh tak a ni.

PM chuan Guru Sahib-te zirtirna hnuaiah Sikh community chu khawvel puma hriat hlawh an nih thu leh, midangte puitu leh chenna leilung siamṭha tura sulsutu an nih thu a tarlang. PM hi senator Francis Joseph Escudero leh Manila City mayor, Francisco Isko Moreno leh official dangten an ṭawiawm.