
Jammu and Kashmir-a CRPF Camp beitu zinga mi kaphlum
Jammu and Kashmir-a Kulgam district-a kar hmasaa CRPF camp beihnaa inhnamhnawih, Lashkar helpawl zinga mi Latief Bhat chu kahhlum a ni tih police-ten nimin Thawhṭanni khan an sawi. He inbeihnaah hian CRPF sipai pathum an hliam a ni.
Bhat hi Kulgam-a cheng a ni a, Pakistan helpawlte nen an thawk ho nia rin a ni a, South Kashmir-a network puihnain hna a thawk ṭhin nia sawi a ni. Bhat hi kumina inbeihna hrang hrangah a lo inhnamhnawih tawh a, chung zingah chuan July 22-a Anantnag-a Lal Chowk huam chhunga police constable thahna leh, July 31-a Kulgam-a migrant worker-te thahnaah a inhnamhnawih niin an tarlang.
November 11 khan Kulgam-a Mir Bazar bula Central Reserve Police Force (CRPF) post chu helpawl ralthuam keng pahnihin silai nen an bei a, sipai pathumin hliam an tuar a, an zinga pakhat chu a dinhmun a ṭha lo hle. Hemi hnuah pawikhawihtute hi ramngawah an tlan bo a ni. Kulgam beih a nih aṭanga darkar 24 liam hmain helpawlte hian Kishtwar district-a special police officer (SPO) pahnih, Babi Chand leh Yashpal Kumar-te an kaphlum a ni. SPO pahnihte hi sipai beih tawkte pui tura an kalna lamah kahhlum an ni.