
Rajasthan Health Minister-in zirlai thar tihduhdahna thlen lo turin hriattir
Rajasthan health minister Gajendra Singh Khimsar chuan, nimin Thawhṭanni khan sorkar leh private medical college-te chu zirlai tharte tihduhdahna a thlen lohna tura hma la turin a hriattir. Zirlai tharte tihduhdahna thleng ṭhin ngaihthahtu college thuneitute chu na taka hrem an ni dawn tih a sawi.
Minister chuan Medical Education Department leh Rajasthan Medical Education Society (RAJMES) chu, sorkar leh private medical college-ah anti-ragging kalpui dan tur ruahmanna siam turin a hriattir. Zirlai senior zawkten an zirlai tharte tihluihna hmanga zan rei tak tak thleng men tira, an duhzawng anga awmtir an tumna te, intihduhdahna hrang hrang leh midang harsatna thlen tirtute chungah khauh taka hma lak a ni dawn tih a sawi a ni.
Hei bakah college thuneitute chu zirlaite tana zirna hmun him leh nuam siam turin a hriattir a, complaint an dawn apiang mumal taka chhuizuina nei turin a chah bawk. Zirlai naupang zawk tihduhdahna tuar, complaint theh luttute chu an nihna puangzar lo turin a hriattir a, an complaint theh luhte hnuhkir tir lo tura tih an ni bawk. Hetiang thubuai hi uluk taka thlei bik nei loa finfiah a ṭul thu a sawi.