Telangana-ah Bharat Summit nei dawn

Telangana sorkar chuan Hyderabad-ah November 13 leh 14 hian Bharat Summit 2026 a thleng dawn a, ram hrang hrang 70 chuang aṭangin ram hruaitute bakah zirna lama mithiam, sumdawng aiawh leh civil society member-te an tel ang. Summit-ah hian khawvel huapa harsatna thleng hrang hrangte leh, thawh hona ṭha neih dan turte an sawi ho ang.

Congress party-a foreign affairs department chairman, Salman Khurshid chuan press conference a neihah, summit-ah hian democracy chungchang, social leh economic justice, climate change, gender equality bakah foreign policy chungchangte pawh sawi ho a nih tur thu a sawi. Congress party president Mallikarjun Kharge, Lok Sabha-a Leader of Opposition Rahul Gandhi, party general secretary Priyanka Gandhi Vadra-te chu summit-a tel tur hian sawm an ni.

Telangana minister Sridhar Baby chuan summit-ah hian special session, 'Telangana Rising' tih thupui hnuaiah neih tel a ni dawn a, he hunah hian state in hmasawnna atana a hmalakna hrang hrangte leh, khawpui chei a nih dante, mipuite hamṭhatna siam a nih dan te, hnam nunphung chawisan a nih dan leh, ṭhalaite tana sorkar hmalaknate pho lan a ni ang, a ti.