NMC-in zirlaite medical college lem lakah fimkhur turin chah

National Medical Commission (NMC) chuan zirlaite leh nu leh pate chu, medical college-te chu admission tih hma emaw, fee an pek hmaa sorkar hriatpuina hnuaia din an nih leh nih loh enfiah turin a hriattir. Hriattirna hi institution ṭhenkhatah phalna mumal nei loin medical course an siam nia report avanga tihchhuah a ni.

He hriattirna hi Supreme Court-in thubuai kalpui mek, Ayesha Jain Amity University, Noida leh a dangtea chungchang thupek a tihchhuah hnuah siam a ni. Court chuan NMC pawh telin, regulatory authority-te chu zirlaite leh nu leh pate chu institution sorkar aṭanga pawmpuina enfiah loa pan lo tura hriattir turin a ti a ni. Thupek hi medical college lem, course hrang hrang pe thei nia sawi chungchang report a nih hnuah a tichhuak.

NMC chuan zirlaite leh nu leh pate chu admission an tih hma leh, course an zawm hma bakah, medical college-a pawisa an pek hmain institution chu belhchian dawl leh rintlak an nih leh nih loh enfiah turin a hriattir. MBBS course-a admission tih tum zirlaite chu NMC official website-a college list-a a awm leh awm loh enfiah tura tih an ni. Hei bakah college chuan academic year atana zirlai lak theihna tura phalna a neih leh neih loh an tihchian a ṭul bawk. Zirlaite chu college brochure, website, advertisement, social media post leh, institution bakah an aiawhten approval letter an tihchhuah ringawt ring lo turin an chah a ni.