Bihar-in zirna ina thawktute tan formal dress code siam

Bihar education minister Mithlesh Tiwari chuan state chhunga zirna in hrang hranga thawktu, zirtirtute bakah non-teaching staff pawh huam telin inchei dan tur, formal dress code nei vek turin a hriattir. Hei bakah entertainment programmes campus-a huaihawta DJ rawih chungchang a ngaimawh thu a tarlang bawk.

Minister chuan zirtirtute nungchang, hnathawh dan leh thawmhnaw inbel dante chuan zirlai naupangah nghawng nasa takin a nei theih thu a sawi.

Education Department director (Administration) Vijay Kumar Pandey chuan district tina officer-te chu sikul hrang hranga thawktu ten zirtirna an pek lai leh, office hour chhungin formal dress code an ha ṭhin em tihte enfiah turin a hriattir nghal a ni. Dress code chungchang tihchhuah a nih hnuah, report hrang hrang an dawn aṭangin thawktute chuan an zawm ṭha lo a, zirtirtu leh non-teaching staff-te pawh casual dress haa an la kal reng thu a tarlang bawk.

Education department chuan heng hmalakna an kalpui chhan hi sawifiahin, school campus chhunga hlimhlawp bawlna lam hawi zawnga zirtirtu leh non-teaching staff-te nun dan chuan zirna lamah nghawng nasa tak a neih thu a sawi. Zirna kawng mai bakah zirtirtute zahawmna leh mawhphurhnate pawh inchei dan uluk loh hian a nghawng theih thu an tarlang bawk a ni.