Delhi Police-ten CSEAM vangin FIR thehlut

Delhi police-te chuan Nilaini khan Meta platform-ah mipa hmeichhiat lama naupang hman khaw loh leh sawisakna lam, Child Sexual Exploitation and Abuse Material (CSEAM) thehdarhna thleng avangin FIR an theh lut tih National Human Rights Commission (NHRC) member Priyank Kanoongo chuan social media kaltlangin a tarlang. Meta hian thla khat liam ta khan AI tool thar hmanga ads ṭha lo fakna hmuchhuak thei an tlangzarh thu an lo puang tawh a ni.

October 9 khan Meta chuan naupang tana him lo tam tak an platform kaltlanga hmuh a nih thu leh, advertising hmanga CSEAM lam hawi a pun nasat thu an tarlang a ni. Hengte hi advertisement pawi lo niawm taka langin, belhchian hnuah CSEAM lam hawi an lo ni zawk ṭhin tih hmuhchhuah a nih thute an lo puang tawh bawk. Heng dan phal loh thilte hmuh chhuah a nih hnu hian Meta chuan zau zawk leh thuk zawka zawn chhuah beihpui thlakin, hetiang kaihhnawiha tel account-te chu platform content aṭanga paih leh block-te an ni tawh.

Meta hian CSEAM kaihnawih chi hrang hrang maktaduai 5.3 chuang chu kumin kum chanve hmalamah khan an lo paih tawh a, heng an hmuh chhuahte aṭanga 98% chu report an nih hmaa hmuhchhuahte an ni bawk. Sawiselna leh fel lo hrang hrang avanga FIR theh luh a nih hnu hian Meta thupuangtu chuan platform a naupangte himna chu an thil duh ber a nih thu leh an ngaihpawimawh thil a nih thu a tarlang.