Supreme Court lawyer Prashant Bhushan lakah FIR ziak lut

Delhi Police chuan Supreme Court-a senior lawyer, Prashant Bhushan lakah Russia foreign minister Sergei Lavrov-a video siam danglam, India sawiselna thu sawitirna chu a thehdarh avangin FIR an ziak lut.

Cyber patrolling neih a nih hnuah,, police-te chuan social media post pakhatah Bhusan-a X account aṭangin Russia Foreign Minister video siam danglam hi share a ni tih an hre chhuak a, hemi hnu November 3 khan Special Cell Police Station-ah FIR hi ziah luh a ni ta a ni.

Police-te chuan video siam danglamah hian thu dik tawk lo leh thinurna chawk chhuak thei thute a awm a, hei hian mi mimal hming a tihchhiat theih bakah khawtlang boruak tibuai thei dinhmunah a siam bawk a ni, an ti. Bharatiya Nyaya Sanhita (BNS) leh Information Technology Act hnuaiah thubuaite hi an ziak lut tih an sawi.

Russia Minister thusawina video siam danglam, social media lama thehdarhah hian India ram chhung inrelbawl dan leh, oil a lei dante chu a sawisel a ni. Mahse, Ministry of External Affairs (MEA) chuan video thehdarh hi a enfiah hnuah siam danglam a ni tih a hmu chhuak a, police-te chuan social media lama thehdarhtu leh a darh dante chu an chhui zui nghal a ni.