Goa college-ah inneih chungchang zirna certificate course hawng

Goa College-a Department of Human Development and Family Studies chuan nupa hlim leh inkawp rem nih theihna tur zirna, certificate course an hawng thar. Certificate course hi “Marriage Readiness: Preparing for Healthy and Lasting Relationships” tih niin kumin December 2 - 17 chhung khian kalpui tum a nih thu Goa College of Home Science Principal Mahesh Pai chuan a sawi.

He course thar hi chief minister Pramod Sawant-a'n Goa sorkarin nupa inṭhenna tihtlemna tura state pumah innei turte tana counselling kalpui ṭhin tum a nih thu a sawi hnuah college hian an puang a ni. State law department tarlan danin kum 2022 leh 2025 chhungin Goa-ah hian inneih leh inṭhen kaihhnawihah petition 3,000 chuang civil court-ah theh luh a ni a, kum 2024 chhung ringawt khan 947 a awm bawk.

Course kaltlang hian inneihna buatsaih dan mai piah lamah nupa hlim tak leh inkawp nghet tak nih theihna tur kawng thuk zawka zir zau a ni dawn a ni. Post graduate leh undergraduate nupui pasal la nei lote tan course hnuaiah hian topic hrang hrang “Dating: Understanding Its Purpose and Dynamics”, “Self-Awareness and the Need to Belong”, “Exploring Masculinity and Femininity and Its Influence on Relationships” leh “Wedding Versus Marriage: Understanding the Difference” tihte zir theih a ni ang.