INDIA bloc-in CEC ban phutin 'Chalo Dilli' rally huaihawt

Eptu pawl intelkhawm, INDIA bloc chuan nimin khan chief election commissioner (CEC) Gyanesh Kumar chu inthlan kalpui danah thil fel tawk loa tia puh a nih chungchangah bang tura phutin nimin khan Delhi-ah 'Chalo Dilli' rally an huaihawt.

Rally huaihawtah hian INDIA bloc hruaitu - Sonia Gandhi, Rahul Gandhi, Akhilesh Yadav leh Mamata Banerjee te pawh an tel. Congress party president, Mallikarjun Kharge chenna in aṭangin Ramlila Maidan panin kawng an zawh a, mipui tel pawh an ṭhahnem hle.

Eptu ṭangrual pawl hian Inrinni khan CEC Kumar ban phutna lantirna kawng khat atan 'public impeachment' an lo buatsaih tawh bawk a, CEC chu ram puma electoral roll ennawn kalpui a nih dana ram danpui phatsana thiltia puhin lungrual takin motion an pass bawk a ni. CEC hi inthlana rorellai BJP chakna tura ruahmanna siam, electoral roll ennawnna Special Intensive Revision (SIR) kalpui mekah dik lo taka list aṭanga voter vbc 13.2 paih, leh prime minister Narendra Modi leh union home minister Amit Shah-te thu ang anga thil tihah te an puh a ni.

Congress hruaitu, Rahul Gandhi chuan kum 2024 inthlanpui neih hnuah electorol roll aṭangin voter 15% paih an ni tih a sawi a; Madhya Pradesh, Haryana, Chhattisgarh, Maharashtra leh Karnataka bakah 2024 Lok Sabha inthlanahte vote rukna nasa tak a thleng a ni, a ti. Trinamool Congress hruaitu, West Bengal chief minister hlui Mamata Banerjee pawhin BJP chu Bengal ru-ah puhin, SIR hnuaia dik lo taka voter paih an nih dante chu an party chuan an bei let zel dawn tih a sawi bawk.

Congress party president Mallikarjun Kharge chuan INDIA bloc chu police, CBI, Enforcement Directorate leh sorkar agency dangte vauzam theih mai an ni lo tiin, BJP chu ram mipui ṭhendarh tumah a puh. Kharge chuan prime minister Narendra Modi kaihhruai sorkar chu India rama democracy humhim leh tundin zel a nih theihna turin paihthlak a ngai tih a sawi.

Samajwadi Party hotu, Akhilesh Yadav pawhin thu a sawi a, BJP chuan 2022-a Uttar Pradesh inthlanah voter tam tak a ru a ni tiin, mipui thlawpna a hmuh tam tawk loh avangin Election Commission chu a hmang ṭangkai tih a sawi. 2022-a vote thlak thei lo voter-te affidavit pawh theh luh a ni a, mahse, complaint theh luh chungchangah hma lakna engmah a awm loh thu a tarlang.