Vawiinah INDIA bloc-in 'mock impeachment' nei dawn

Eptu pawl intelkawm, INDIA bloc-in nimina Chief election commissioner (CEC) Gyanesh Kumar banna tura nawrna atana 'mock impeachment' an buatsaih tum chu vawiin atan an sawn. Mock impeachment hi Congress party president, Mallikarjun Kharge chenna inah nimin khan neih tum a ni a, mahse khaw chhia leh ruahsur nasa avangin an ṭhulh a, vawiinah an nei dawn ta zawk a ni.

INDIA bloc hian CEC Kumara'n a thuneihna hmangsuala 'vote rukna' a thlen nia puh vang leh, electoral roll ennawna Special Intensive Revision (SIR) kalpui danah felhlel awm avangin 'mock impeachment' hi neih an tum a ni. Congress MP leh Lok Sabha-a Leader of Opposition, Rahul Gandhi chuan an hun hman tur sawn a nih thu hi social media post kaltlangin khawchhia in a nghawng buai theih avangin sawn a nih thu hi a tarlang. Vawiin chawhnu dar 3-ah Kharge chenna in a neih a ni dawn tih a sawi.

Congress party chuan mock impeachment neihna tur atana Constitution Club leh Talkotra Stadium hman an dilna chu phalsak an nih tak loh avangin party president in hi an thlang ta a ni.

Hei bakah Congress-in naktuka kawngzawh huaihawt an tum pawh Chamber of Trade and Industry (CTI) chuan Diwali zawhah sawn turin Congress hruaitu Sonia Gandhi hnenah ngenna an thlen bawk. CTI lam hian sawn tura an ngen chhan hi tarlangin, festive season lai a nih avangin sumdawnna lam a nghawng nasa dawn a, Delhi huam chhunga sum chevel Rs vbc 10,000-12,000 bawr a tibuai pha dawn niin an sawi a ni.