Rajnath Singh leh Hegseth ten India-US thawh dunna thlirlet

Defence minister Rajnath Singh leh US secretary of war Pete Hegseth te chu nimin Nilaini khan Cebu, Phillippines-a ASEAN meeting neih karlakah inhmuin, India leh US-in kum 10 chhung kalpui tur inremna an siam 'Defence framework pact' thlirletna hun an hmang. Hruaitu pahnihte hian defence huanga inremna an lo neih hrang hrang - critical technology, information sharing, leh sipai hardware siam chhuah dunna an kalpui tawh dante an thlirlet a ni.

India leh US thawh dunna bakah Indo-Pacific dinhmun leh ramri chhunga venhimna inkar zau lutukte thlengin an sawi dun a ni. India leh US hian nikum October thla khan defence huanga thawh dunna tihhmasawnna turin inremna an lo ziak tawh a, ram pahnih chhawr ṭangkai tur ruahmanna zau tak an siam a ni. Ram pahnih hruaitute hian inkawmna hlawk thlak tak an neih thu social media kaltlangin an tarlang ve ve bawk.

Defence lamah ram pahnihte hian inzawmna ṭha tak an lo nei tawh ṭhin a, kum 11 liam ta khan US chuan India chu defence lama a thawhpuilian ber, 'Major Defence Partner' tiin a lo sawi tawh a ni. Defence leh security huangah inremna pawh eng emaw zat an lo ziak tawh a, heng zingah hian an military base-te inhmantawn sak phalna, kum 2016-a an ziah Logistic Exchange Memorandum of Agreement (LEMOA) pawh a tel. Kum 2018 khan COMCASA (Communications Compatibility and Security Agreement) an ziak a, kum 2020-ah BECA (Basic Exchange and Cooperation Agreement) an ziak bawk. He inremna hi high-end military technology leh geospatial map inhrilh tawnna tura tih a ni.