Jaishankar-a'n buaina hmachhawn kawngah hma hruai turin UN a ngen

External affairs minister S Jaishankar chuan khawvela buaina hrang hrang hmachawnna kawngah, United Nations chu a thlirtu ni ngawt loa chak taka hma hruaitu ni turin a ngen.

Nimina UN Day puala New Delhia Chinmaya Amrit Mahotsav Global Sammelan hmannaah Jaishankar chuan he thu hi a sawi a ni. 'Khawvelin harsatna leh buaina hrang hrang a tawh meknaha, UN chuan hruaitu a nihna a lantir a ngai a ni," tiin a sawi.

EAM chuan Russia-Ukraine indona thleng mek bakah US, Israel leh Iran telna West Asia buaina chungchangte sawiin, heng buainate hi palaite inbiakna hmang chauha chinfel theih a ni tihah India chu a la ding nghet zel tih a sawi. Hetih lai hian mipui nawlpui chu buaina tuartu ber an ni, a ti. Buaina hrang hrang thlen mekahn, khawvel chu ngawi renga lo thlirtu ringawt a ni tur a ni lo tiin, India chuan buaina chinfelna a nih theihan turin a theih angin hma a la a, remna leh muanna a awm theihna turin ram dangte nena hma lak ho pawh a inhuam reng a ni, a ti.

Khawvel muanna tichhe thei chu firfiaka chetna a nih thu sawiin, hei hi ram hrang hrangten hmanrua atana a hman chu pawm theih a ni lo, tiin a sawi. Eng kawng mahin firfiak zawnga chetna chu a dik tia sawi theih a ni lo a, pawm theih a ni lo, a ti. Firfiaka chetna do letna kawngah khawvelin chak zawka hma a lak ngaih thu a sawi. Remna leh muanna awm chu khawvel hmasawnna nena inthlunzawm tlat a ni tih sawiin, hmasawnna leh hausakna chu buaina leh tharum thawhna nena inletling thawk an nih thu a sawi.