PM Modi-a'n Diwali laiin tualchhung thil siam lei uar turin chah

Prime minister Narendra Modi chuan nimin khan thlatina radio kaltlanga thuchah a sawi ṭhin, 'Mann Ki Baat' hun hmang lehin, kum 12 chhung radio kaltlanga thu a sawi theihna zinkawng chu a tana zinkawng pawimawh "pilgrimage" a nih thu a sawi. A thusawi lo ngaihthla ṭhinte chu a zinpuite leh kawng kawhhmuh tute an ni, a ti. PM Modi chuan ram mipuite chu Diwali lo thleng turah 'Vocal for Local' (VFL) hlawhtlin theihna tura tualchhung thil siamte lei uar turin a chah nghal bawk.

Vocal for Local hlawhtlinna chu India mahni kea din theihna tura kawng pawimawh a nih thu sawiin, Prime Minister chuan tualchhunga thil siamte khawvel huapa thawn chhuahna kawng zau zawk hawn theihna a nih thu a sawi. PM chuan Bihar-a thar chhuah 'makhana' leh Karnataka-a thar chhuah 'arhar dal' te chu rampawna thawn chhuah a nih thu sawiin , VFL chu ramchhung lo neitute tan huang zau zawka bungraw thawn theihna pawimawh a ni, a ti.

Tualchhung thilsiam ṭhan lenna kawngah VLF chuan a puih theih thu sawiin, mahni kea dinna tura hmathlir hlawhtlinna kawng pawimawh a nih thu a tarlang. Hei bakah traditional farming Punjab-a tuaithar leh a nih chungchang pawh sawi langin, hemi kaltlang hian 'Kheti Virasat Mission' chuan organic farming lamah bung thar a kai thei a, hei hi lawmawm a tih thu a sawi lang bawk.