AP ramriah India leh China innghirngho leh

India leh China-in ramri chungchanga remna leh muanna siam tuma hma an lak mek karah Arunachal Pradesh ramri-ah India leh China sipaite chu an in nghirngho leh ṭan mek niin Indo-Tibetan Border Police(ITBP) director general Shatrujeet Kapur chuan a sawi. Kapur chuan tun hnaite khan Arunachal huamchhung ramri depah innghirnghona a thleng niin Ningani khan a tarlang a ni.

Ram pahnihten ramri chungchanga buaina an neihte chu kumin July aṭang khan a fel chho mek nia sawi a nih hnuah, tun ṭum hi hmarchhak bial ramria innghirnghona a thlen leh hmasak ber nia sawi a ni. Ramri chungchangah hian ram pahnihte hian kumin July aṭang khan ṭum thum high-level meeting an nei tawh a, hei bakah September thlaa 18th BRICS Summit India-in a thlen pawh khan China president Xi Jinping chu India-ah a rawn zin tawh bawk.

Kumin chhungin ramria sipai dahna hmun aṭangin ram pahnihte hian an sipai eng emaw zat an lo hnukkir tawh a, Line of Actual Control(LAC) hnaiha sipai hmunte thlengin singsak hna kalpui a lo ni tawh a ni. Mahse, China lam hian tun hnaiah LoC aṭanga km 7 bawrah hmun rawn khuar thar lehin sipai inkarah inghirnghona a awm zui ta a ni. India lam pawhin China lam chet dan vang hian ramri hnaihah sipai an tirh belh nghal a ni.