Rubio-a'n US leh Venezuela oil lei turin India a nawr

US secretary of state Marco Rubio chuan India chu US leh Venezuela aṭanga oil-te lei turin a sawm. External affairs minister Dr. S. Jaishnakar nena an inkawmnaah he thu hi sawiin, Venezuela oil-te chu Mukesh Ambani ta Reliance Energy plant, Jamnagar-a thlitfim a nih ve ngei theih dan turte a sawipui a ni. India leh US in insumdawnna kawnga inremna an siam tum, hun rei tak tihkhawtlai tawh free trade agreement (FTA) pawh peihfel ṭep tawh thu a tarlang bawk.

Mumbai-a Rubio leh Jaishnakar inkawmnaah hian India leh US inkara energy lama thawh dunna, sumdawnna leh inpawhna ṭha neih chu thupui berah neih a ni. EAM hian Rubio bakah United Arab Emirates foreign minister Adbullah Bin Zayed pawh a kawm bawk. Ram hruaitu pahnihte hi EAM hian a hran ve ve in a lo dawngsawng a, a hnuah meeting an neih ho leh bawk. He hunah hian ram pathum thawh hona tur, trilateral cooperation hlawhtlin theihna tura harsatna awm chungchangte an sawi ho a ni.

Jaishankar chuan meeting-ah hian energy, connectivity leh tunlai mil hmasawnna ture chungchanga thlir dan neihte inhrilh tawnna hun hman a ni tih a tarlang. US ambassador Sergioa Gor pawhin ram pathumte tan energy, trade, technology leh ram inkalpawhna kawngah thawh hona tihhmasawnna kawng ṭha tak a inhawn mek thu a sawi ve bawk.

India-US-UAE trilateral meeting hi MEA lam hian puang lawk lo mah se UAE lamin energy thawn chhuah kawnga harsatna a neih mek lai karah inhmuhkhawmna hi neih a ni. He inkawmna hmang hian India tan energy mamawh phuhrukna tur leh ram pathum thawh hona kawngah nasa zawkin hmasawnna a thlen beisei a ni. Hetih lian hian kum 2021-a ram pathumnten Israel tela an lo din, 'I2U2", India-Middle East Economic Corridor (IMEC) chungchang erawh an sawi lang tel lo.