Ladakh aiawhten MHA rawtna pawm lo

Ministry of Home Affairs (MHA) official leh Ladakh-a pawl pahnih, Leh Apex Body (LAB) leh Kargil Democratic Alliance (KDA) aiawhte inbiaknaa MHA lam rawtna neih an pawm lo tih LAB leh KDA chuan an sawi. MHA rawtna siam chu thutiam tihkhawtlaina mai a nih thu an tarlang.

October 15-a sub-committee level inbiakna an neihah khan MHA hian an rawtna duan, phek 32-a chhah chu an tarlang a ni. Mahse, hei hi pawl pahnihte hian an pawm thei lo tih sawiin, Ladakh hnen-ah UT anga legislative body pek a nih hma leh dan mumal Article 371(K) hmanga humna an hmuh hma chu lungawi an la tum loh thu an tarlang.

LAB co-chairman Chering Dorjey chuan MHA-te chu thutiam anga awm lo leh inbiakna hmasa zawk, May 22 -a an sawi anga an awm ta lo chu a dem takzet thu a sawi. Hemi ṭuma an meeting-ah hian elected UT level body din remtih a nih thu a tarlang. Sorkar laipui chu pawl pahnihte rawtna theh luh pawm tura ngenin, Ladakh tana an thil ngiat angte tihkhawtlai nana hun khawhral mai an nih zawk thu a sawi.