Anti-drug activist Jhota thih danah Punjab sorkar chhanna pe turin phut

Punjab-a Mansa district-a anti-drug activist Parvinder Singh Jhota thihna thleng chungchangah Ministry of Home Affairs chuan Punjab-a Aam Aadmi Party (AAP) sorkar aṭanga chhanna pek an phut thu union home minister Amit Shah chuan nimin Zirtawpni khan thuchhuah siamin a tarlang. Punjab anti-drug activist Jhota hi tun kar tir lam khan damdawi dawr neitu, dan phal loh damdawi zuartu nen an inhnial buai hnuah dawr neitu hian silain a kaphlum a ni.

Jhota hi boxer hlui niin kum eng emaw zat liamta aṭang khan ruihhlo do beihpui thlak hian Mansa leh chheh velah hian hma a lo la tawh ṭhin. Kahhlum a nih hnu hian sorkar chuan ruihhlo do hna thawhnaah hmalakna kalpui ṭha lo leh drug inspector mumal ruat loh avanga ṭhahnem ngaiten beihpui an thlak a ngai a, thihna hial a thlen phah tiin beihzui a tawk nasa hle.

US lawmaker Thomas R. Suozzi chuan Jhota thihna hi langtlang taka chhuina kalpui turin India ambassador Vinay Mohan Kwatra hnenah lehkha a thawm bawk. Ruihhlo do avanga thi Jhota chu Akal Takht hotu, Giani Kuldeep Singh Gargaj chuan martar tiin a sawi a ni.

Shah chuan social media kaltlanga post a siamah," Punjab-a ruihhlo hmanga sumdawnna chu a ni telin a pung tual tual a, pawikhawihna vanga harsatna thleng pawh a hluar zel a, ruihlo dona avanga hmalatu leh beitute himna chungchangah pawh harsatna a thleng mek a ni" a ti. Hengte avang hian MHA chuan Jhota thihna chungchangah chhanna pe turin Punjab sorkar a ngen a ni.