India- US insumdawn tawnna tur inremna thawh khatna zo : Goyal

Commerce and industry minister Piyush Goyal chuan nimin khan India leh US insumdawn tawnna tura inremna tur chu a thawh khatna zawh fel a nih thu sawiin, dan lam thila ruahmanna siam ngaite kalpui mek a nih thu a tarlang. Goyal chuan zawhfel thuai a beisei thu sawiin, India-in hlawkna tam zawk a chan theih hunah hman theiha kalpui a nih tur thu a tarlang tel bawk.

Trade Secretary Rajesh Agrawal pawhin ram pahnih insumdawn tawnna tur chungchanga inbiakna chuan kawng dik a zawh mek thu sawiin, dan lam tihfel mek a nih thu hi a sawi lang ve bawk. US secretary of state Marco Rubio chuan October 17 - 22 chhung hian India leh Uzbekisatan a tlawh dawn a, sorkar hruaitu leh sumdawng lian hruaitute nen energy huang thawh hona, commercial investment leh ramria economic hmasawnna tura thawh hona chungchangte a sawi pui nghal ang.

India leh US thawh dunna hi kum liam taa US president Donald Trump-a'n India leh Pakistan inkar buaina chingfeltu leh inkahhai puantirtu anga a inchhal hnuah khan a chhe zual a, US sipai lamin Oman tuipui huam chhunga lawng an kah ṭuma India mi pathum an thih avangin an inkar hi a ṭha lo chho viau bawk.

Goyal chuan India leh European Union ram nena insumdawn tawnna tura inremna tur Free Trade Agreement chu kumin December khian ziahfel hman tum a nih thu sawiin, inremna hi ziah fel a nih chuan FTA hi nakkum February emaw March emawah hman ṭan theih tum a nih thu a tarlang.