Punjab-a Anti-drug activist Parvinder Singh kap hlum

Punjab-a anti-drug activist hriat hlawh tak, Parvinder Singh, Jhota tiha hriat bawk chu nimin Thawhlehni zing khan Mansa, Punjab-a damdawi dawr neituin a kap hlum a, mi dang paliin hliam an tuar bawk.

He inthahna hi Jhota Facebook page-a live broadcast neih laia thleng niin, Jhota leh a thurualpuite chuan damdawi dawr pakhat neitu, dan phal loh damdawi a hralh chhuah chungchanga thu an zawhfiah laia thleng a ni.Video-ah an inbakkaih laite pawh langin, Jhota-a'n dawr neitupa in a pistol a la chhuak tih thu a sawite pawh hriat theih a ni a, hemi hnuah silai hian Jhota hi kah a ni a, video-ah pawh hei hi a in record a ni.

Jhota hi kah a nih hnuah damdawi-in lam panpui nghal a ni a, mahse, chhan hman a ni ta lo niin police-te chuan an sawi. Police-te chuan Jhota hi hmun thumah silai hian kahfuh a nih bakah, a thurualpui palite pawhin hliam an tuar a, an zinga pakhat chu a hliam na hle niin an tarlang. Dawr neitu hi a bibo nghal nia sawi a ni bawk.

Kum eng emaw chen kalta aṭangin Jhota hian Mansa-ah dan loa damdawi hralh chhuah a nih leh, damdawi hmansualna awm ṭhin chu a vei thu a lo aupui tawh a, damdawi dawr hrang hranga damdawi hralh chhuak ṭhin a nih dan pawh a sawi chhuakin hetiang thil tihtawp a nih theihna atan hian hma a la a ni.

Pubjab-a chief minister Bhagwant Manna kaihhruai Aam Aadmi Party(AAP) sorkar chuan ruihhlo do campaign, 'Yudh Mashian Virudh' a kalpui mek a, hetih lai hian Jhota chunga thil thleng avang hian eptute chuan sorkar chu hma a lak danah an sawisel zui nghal a ni. Dik lo taka damdawi zuar leh hralh chhuakte dap leh endik chu drug inspector-te tih tur leh mawhphurhna a nih laiin, dan leh thupek kenkawh ṭhat a nih loh avangin mimal chet chhuah a ngaih phah a ni, an ti.