Mobile phone chu inrelbawlna ṭha thlentu pawimawh a ni: PM Modi

India Mobile Congress (IMC) vawi 10-na nimina neihah prime minister Narendra Modi chuan India chu telecom sector hrang hrangah a ṭhan nasat thu sawiin, mobile networks, spectrum leh internet chak ṭha tak bakah mobile conectivity hmasawnna chuan vantlang hnathawhnaah inrelbawlna ṭha thlentu a nih thu a sawi

Prime Minister chuan mobile phone chu nasa taka a ṭhan thu sawiin, inbiakna pangngai atan chauh hman ṭhin aṭangin inrelbawlna ṭha tak siamna tura hmanraw pawimawh tak a nih chhoh tak thute a tarlang. IMC ṭhan chhoh dante tarlangin, hetiang event buatsaih hi India telecom zinkawng atan hmun pawimawh tak a chan thu leh, kum 2022-ah 5G hman theih niin International Telecommunication Union (ITU) assembly chu kum 2024 ah a thlen theih phah tih a tarlang.

Modi chuan "Kum 10 liamta kha chuan digital device chu chona thar niin, thiamna thar lo chhuak chu hmasawnna thlentu a lo ni ta zawk a ni" a ti. Sorkar chuan mipui tana hman awlsam turin digital hmanruaah huang a zauh a, vantlang inrelbawlna ṭha thlentu atana hmun laili luahtu a nih thu sawiin, hengte a hlawhtlin theihna tur hian Digital India programme kaltlangin sorkarin hmalakna a neih thu a sawi.

Ramchhunga telecom sector ṭhanna chu network speed chak ṭha leh spectrum ringawtah teh loin, inrelbawlna huang leh mipui tana nghawng a neih dan leh hman awlsam zawka kalpui a nih theihna chu thlir zawk tur a ni, a ti bawk. Covid-19 hri leng chuan India digital ecosystem pawimawh ziah a tihlan thu leh, office leh bank bakah zirna in thlenga kalpui chhunzawm a nih theihna chhan chu India digital hmasawnna tilangtu a nih thu a tarlang.