Sorkar laipuiin TB umbona turin state 11-ah JOSH team tir dawn

Sorkar laipui chuan ramchhunga Tuberculosis (TB) umbo a nih theihna turin Joint Squad for Health (JOSH) team chu state 11-a district hrang hrang 55-ah a tir dawn tih Union Health Ministry chuan nimin khan an puang. He hmalakna hi tualchhunga ṭhalaite kaihhruaia TB umbo hna thawh tihchakna tura a ruahman a ni.

JOSH team hian TB awm lohna ram dinna turin a bul ṭhut aṭanga inzirtirna leh he natna hrik chungchang hrilhfiahna an kalpui dawn tih ministry thuchhuah chuan a tarlang. He hmalakna hi union health minister JP Nadda chuan vawiin hian Bharat Mandapam, New Delhi-ah a tlangzarh dawn a, youth affairs and sports minister DR Mansuk Mandaviya pawh a tel ang. Hun hmanah hian senior official, elected representative, Class-I officer, MY Bharat Voluntter, NCC cadet, leh TB umbo hna thawhna kawnga tha thawhtu hrang hrangte an tel bawk ang. TB Mukt Bharat Abhiyaan-in TB umbo kawnga a hmalakna leh hlawhtlinna a neih hrang hrang video hmangin pho lan a ni dawn bawk.

Ministry chuan, JOSH team hi mipui huap tel theihna tura sorkar hmalakna pawimawh tak a nih thu a tarlang a, a bul thuma inzirtirna chuan TB umbona kawnga nasa taka a puih tur thu a sawi.