India-Switzerland in thawh dunna tur inremna 5 ziak

Prime minister Narendra Modi leh Switzerland president Guy Parmelin ten Thawhṭannia inbiakna an neih hnuah, an telpuina hnuaiah ram pahnihte chuan sumdawnna, investment, defence, nuclear energy leh infrastructure huanga thuk zawka thawh dunna tur inremna panga an ziak nghal a ni.

Ram pahnihte inremna siam hian migration and mobility partnership, professional naupang zawkte tana thiamna inthleng tawnna tur programme, transport technology-a thawh dunna, leh infrastructure hmasawnna huanga thawh dunna turte a huam tel. Switzerland president Parmelin hian PM Modi-a sawmna angin, ni thum cham turin Thawhṭanni khan India a rawn thleng a, kumin February thlaa New Delhi-a AI Impact Summit hmanga a rawn zin hnua a rawn zin lehna hmasa ber a ni bawk. Senior official leh corporate executive eng emaw zatin an rawn zui a ni. Vawiina India-EFTA Prosperity Summit vawi hnihna neih turah a tel nghal ang.

India leh Switzerland hian insumdawn tawnna huang zauh remti ve ve bawkin, India bungrua Switzerland-a thawn luhna tur leh, Swiss investor-ten India-a investment an rawn tihtheihna turin an inrem bawk. Heng inremna tharte hian India thlai thar, damdawi, puan leh engineering lam bungruate thawn chhuahna hun ṭha a siamsak dawn a, hemi rual hian Swiss investor eng emaw zat ramchhungah a hip luh theih tur thu PM Modi chuan a sawi. Modi hian kum 2016 leh 2018 khan Switzerland hi a lo tlawh ve tawh bawk.

Switzerland hi India-in Europe-a economic partner a neih lian ber pawl niin, ramchhungah Swiss company enkawl hrang hrang 330 chuang a awm mek a ni. India leh EFTA ram pali - Switzerland, Iceland, Liechtenstein leh Norway ten inremna an siam, Trade and Economic Partnership Agreement (TEPA) pawh hi tun thla aṭang hian hman ṭan a ni dawn bawk. He inremna hmang hian kum 15 lo awm tur chhungin India ramah USD tld 100 investment leh hna maktaduai chuang India mi leh sa tan a siam thei dawn a ni.