Phar naupang 3,832 enkawl mek, nakkumah inkaichhawnna tihtawp hman tum

India sorkarin kum 2027-a ram chhunga phar natna inkaichhawng zel tur tihbona tur target a siam kalpui mek karah, kum 2025-26 chhungin ram chhunga naupang zingah phar vei thar 3,832 hmuhchhuah a ni.

National Leprosy Eradication Programme (NLEP) ruahmannain kum 2025-26 chhunga naupang phar vei hmuhchhuah mi 2,000 aia tlem tura bituk a nih laiin, tuna hmuhchhuah zat hian 91.6% laiin target a pel a ni. Heng naupang natna hrik pai hmuhchhuah zingah hian mi 37 chu Grade-2 Disability (G2D) nei tawh, an taksa piansual phahte an ni. Hei hian natna hrik hi a hun taka hmuhchhuah zung zung a nih loh zia leh tualchhungah inkaichhawnna a nasa rih hle tih a tarlang.

National Strategic Plan for Leprosy (2023-27) hnuaia India sorkar thil tum lian ber chu district hrang hrangah kum nga chhung a zawnin tualchhunga naupang phar vei thar hmuhchhuah awm lohna 'zero indigenous child cases' puitlin a ni. Mahse, state hrang hrang Chhattisgarh, Jharkhand, Maharashtra, Odisha leh Madhya Pradesh ahte phar vei tam zualin, a veite hi hmuhchhuah tlai a nih ṭhin avang leh damdawi 'Multidrug Therapy' nen enkawl ṭhin a nih vangin he target puitlin tur hian ṭan lak a ngai hle nia tarlan a ni.