UPSC kum 100 tlin lawmna PM Modi-an hman pui

Union Public Service Commission (UPSC) kum 100 tlin lawmna chu nimin khan Bharat Mandapam, New Delhi-ah ropui taka hman a ni. He hunah hian prime minister Narendra Modi chu khuallian niin, kum 100 tlinna pual hian 'commemorative coin', postal stamp leh lehkhabu '100 Landmark Judgements: Shaping the Policies of UPSC and Public Service Commissions in India' tih chu a tlangzarh nghal bawk.

UPSC kum 100 tlin lawmna hi kum 2025 October 1 a ṭanga kalpui ṭan tawh kha niin, kum khat chhung hmun hrang hranga neih a nih hnuah nimin khan a kum 100 tlin lawmna tlipna hlawhtling taka neih a ni ta a ni. PM Modi chuan ram rawngbawl hna leh sorkar hna thawk tura mi thiamte lak luh dan phungah rilru thar put a ṭul thu a sawi a, "Kan thupui chu mipuite hi kan tana Pathian tluk an ni. Chuvangin mipuite rawngbawl hi kan tan a pawimawh ber a ni," a ti.

Modi chuan thupui pawimawh tak pahnih "Nation first" leh "Citizen first" tihte hmanga kal a ṭul thu a sawi. Rawngbawlna rilru dik tak pute sorkar hnaah lak luh zawk tur an nih thu tarlang bawkin, "A thiamna chin chauh fiah loin, 'eng vangin nge civil service zawm a duh' tih te pawh en tel a pawimawh a ni," tiin a sawi.