Somalia-a fuel tanker hijack-a thi 5 zingah Indian sailor tel

Somalia rama pirate- fuel tanker an hijack-a chuang, crew member panga thi zingah Indian sailor pakhat a tel tih official-te chuan an sawi. Puntland maritime Police Force (PMPF) chuan Pakistan mi pathum, India mi pakhat leh Myanmar mi pakhat chu Thawhlehni khan an thi tih an puang.

Pakistan crew member pathum leh India mi pakhat an hliam bawk.

PMPF chuan heng mite thihnaah hian Puntland tuipui kama Somali pirate-te an inhnamhnawih nia sawiin, crew member-te thih dan leh thih hun kimchang erawh an tarlang lo.

European Union's naval force EUNAVFOR chuan, lawng hi April thla khan Somalia khawpui, Mogadishu a pan laia hijack a ni tih a tarlang. Lawngah hian crew 17 chuangin, a tam zawk chu Pakistan mi an ni a, oil lam an phur bawk a ni.

Thawhlehnia social media-a an tarlan danin, PMPF chuan Bandar Beyla district-a Dharin-baar-ah chhan chhuah beihpui an thlak a, pirate-ten MT Honour 25 oil tanker an hijack chu hlawhtling takin an chhan chhuak tih an sawi. Lawng hi tunah chuan a him tawh a, Puntland sorkar enkawlna hnuaiah a awm tawh bawk tih tarlan a ni. He thil thleng chungchangah hian pirate nia rinhlelh mi 16 man an ni tawh a, mi dang zawn chhuah tumin hma lak mek a ni bawk.