India chu kum upa tamna ramah a chang chho dawn: Moody Reports

Tun kum zabi tawp lam a lo thlen meuh chuan India ramah ṭhalai leh naupang aiin tar leh kum upa an tam zawk tawh rin a ni a, hemi a nihna chhan tur ber chu nau piang zat 'fertility rate' tlahniam zel leh age structure inthlak chho zel vang a ni tih credit ratings firm lian Moody’s Ratings chuan report a tihchhuah tharah a tarlang.

Moody’s chuan ram sum leh pai ṭhang zel tur leh credit dinhmun ṭhatak nei tur atan mihring pung zel hian a thawh hlawk ṭhin zawk laiin, tun hnaia fa hrinna tlahniam ta hluai hian chu dinhmun chu a thlak thleng thu an tarlang a ni. Kut hna thawktu zat tlem zel hian thil siam chhuah leh hnathawh theihna zat 'productive capacity' a tihniam dawn a, chhungkua leh mihring thil leitu 'consumer demand' tlem tawh dawn chuan ram hnufual leh ṭhang mek te chu thawhchhuah (productivity) hmasawnna lama tan la vak turin a nawr dawn a ni.

Khawvel pum huap thlir chuan, kum 1950 hunlaia hmeichhe pakhatin chawhruala fa 4.9 an hrin ṭhin laiin tunah chuan khawvel pum chawhrualin fa hrin 2.2-ah a tla hniam tawh a, hei hi fa hrin zat in banlek dan replacement rate 2.1% a tling ṭawk ṭawk chauh a ni. Moody’s chuan khawvel mihring 70% aia tam hi fa hrinna tlakhniamna ramah an cheng mek a, khawvel a sum leh pai dinhmun ṭha ram lian ber berte hi an kum a upa rual chho ṭhup a ni, tih an tarlang.

India ram hi tunah rih chuan mihring za zela a tam zawk chu ṭhalai zel la ni mah se, fa hrin a hniam tak em avangin kum zabi tawp lamah chuan kum upa zawkte an tam tawh dawn a ni. Ram ṭhen khat fa hrinna tlahniam chak zualte hian an hmalam kum 10-20 chhungin kum upa zawk punna an hmachhawn dawn bawk a ni.