Iran lawngah ruihhlo Rs vbc 3,000 chuang hu man

Gujarat ATS leh Indian Coast Guard-te chuan Arabian Sea-ah Iran lawng aṭangin ruihhlo, Rs vbc 3,000 chuang hu an man. Ruihhlo an man hi kg 526 chuang niin, heroin leh methamphetamine te an tel. Lawnga thawk, Pakistan mi panga man an ni a, lawng hi Mumbai lamah hruai a ni bawk.

Gujarat ATS, Central Intelligence Agency leh intelligence agency dangte hnen aṭanga thu an dawn bawhzuiin, Indian Coast Guard-te chuan ruihhlo phurtu lawng hi tuipuiah an zawng a ni. Lawng hi an hmuh hnuah uluk taka enfiahin, ruihhlo tam tak a phurh chu an man a ni.

Indian Coast Guard chuan social media-ah hemi chungchang hi tarlangin, Gujarat ATS leh Central Intelligence Agency te nen an thawh hona hmangin lawng hi an man thei tih a sawi. Lawnga thawk Pakistan mi panga mante chu thu zawhfiah niin, lawng neitu leh a kal tumna te, ruihhlo tawlhnaah eng network nge inrawlh tihte hriat chhuah tum a ni.

Gujarat police-te hian kum 2021 aṭang khan beihpui an thlakna hrang hrangah ruihhlo kg 87,607 an man tawh a, heng ruihhlo hlut zawng hi Rs vbc 16,155 an tling. Ruihhlo kaihhnawihah hian mi 2,500 chuang an man tawh bawk.

DGP committee chuan ruihhlo do beihpui thlaknaah, ruihhlo man a nih theihna atana tha thawhtu mi 64 te hnena lawmman pekna tur a pawm bawk a ni.

Union home minister Amit Shah chuan Coast Guard, Gujarat ATS leh central agency-te thawh hona hnuaia ruihhlo tam tham tak man a ni chu lawmawm a tih thu sawiin, joint operation neitute a fak zui bawk. Shah chuan prime minister Narendra Modi kaihhruai sorkar chuan ruihhlo hmansualna laka ṭhalaite venghim turin theihtawpin a bei dawn a ni, a ti.