Congress President-in CEC Kumar BJP 'puppet' tiin a sawi

Congress party president, Mallikarjun Kharge chuan chief election commissioner, Gyanesh Kumar chu BJP-in an duh dan dana an thunun theih milem, an 'puppet' tiin a sawi a, a hna aṭanga bang turin a phut.

Nimina Congress Working Committee (CWC) meeting neihah, Kharge chu Gyanesh Kumar chu a office luah zel tura tlak lo leh dikna nei lo, tiin a sawi. "Election commissioner pahnih ngei pawhin CEC chu thil dik leh dik lo pawh ngaihtuah loa thilti niin an sawi," a ti. Election Commissioner pahnih, Vivek Joshi leh Sukhbir Singh Sandhu-te chuan electoral roll ennawnna, Special Intensive Revision (SIR) kalpui dan chu vawi tam tak sawiselin zawhna pawh an lo siam fo tawh a, mahse hetichung hian CEC hian a duh dan angin a kaltlangpui tho a ni.

Kharge chuan, "Tunah chuan ram pumah thutlukna a siam luih tlat hian rorellai party-in an hlawkpuina tura a tih a ni tih an hre tawh a ni. Hetianga thil a kalpui danah hian office luah zui zel tlak a ni a, rang taka ban nghal a ni tur a ni," a ti.

'Chief Election Commissioner chu Modi-a sorkar nautelem ni tawh. A thawhpuite ngei pawhin an ring tawh lo. Ṭhalaite pawhin a Chetdan chungchangah zawhna tam tak an nei dawn a ni," tiin Kharge chuan SIR kalpui mek chungchanga Congress party thil phut pangate chu CWC meeting-ah hian a sawilang bawk.An thil phut zingah hian electoral roll data tihdanglamte chu mipui hmuha tlangzarh vek, list aṭanga voter paihte appeal-na hun siamsak, political party hrang hrangte hnenah formal en awlsam tak hmanga electoral list pekte tel.

Congress president chuan prime minister Narendra Modi pawh a duh dan anga thil kalpui tura poll panel nawrah a puh a, hei vang hian PM pawh bang tura a phut thu a sawi bawk. Democracy ramah mipuiten vote thlak turin dikna chanvo an nei a, hei vang hian vote dik takte an chanvo paihsak an ni tur a ni lo, a ti. Electoral roll ennawn mekah Form 6 rules thlak a nih dan chu sawiselin, ram danpui nen pawha inmil lo a nih thu a sawi.

Congress party chuan party, institution leh mimal emaw an bei lo tih sawiin, Kharge chuan voter-te dikna chanvo, ram danpui leh democratic system humhalh chu a tum zawk a ni, a ti. Election Commission chu rintlak, tumahin an duh dan anga an kawh kual mai mai theih ni lo turin an duh tih sawiin, rorellai leh eptu party-te pawhin an rinngam ni turin a duh tih a tarlang.