Bank hnathawktuten ni 3 chhung nawrh tum an ṭhulh

Bank hnathawktu ṭangrual pawl, United Forum of Bank Unions (UFBU) chuan rampum huapa ni thum chhung bank nawrh an lo tum tawh chu an ṭhulh lailawk thu an puang. He thu hi Pathianni zan khan Indian Banks' Association (IBA) leh bank union hotute remruatna leh inbiakna neih a nih hnuah puan a ni.

UFBU thuchhuah tarlan danin, bank hnathawktute chawlhdan chungchang leh Inrinni zawng zawng chawlh tura puan a nih theih nan IBA leh UFBU aiawhte awmna High-Level Committee din nghal a ni dawn a ni. He committee hian hma lakpui a, dawrtute leh pawl hrang hrang harsatna thlen lo zawnga thil chinfel an tum dawn bawk.

Bank officer Scale IV leh a chunglam tana Performance Linked Incentive (PLI) scheme leh tun hma deuha thurel zawh loh awm hrang hrangte pawh chinfel tura inbiak chhunzawm zel tura inremna siam a ni. He inremna hi siam a nih tak avangin September 28 aṭanga September 30 thleng, ni thum chhung nawrh tumna leh hmalak zui tumna zawng zawngte chu kalpui chhunzawm lo rih tura thutlukna siam a ni ta a ni.

AIBEA General Secretary C.H. Venkatachalam chuan, "Kan thil phutte hi ngun taka inbiakna neih a nih hnuah thil lawmawm tak a awm chho dawn ta a, he committee hmang hian mipuite leh bank dawrtute harsatna thleng tur pumpelh a ni dawn a ni," tiin a sawi.