UPI MDR-in mipui tan phurrit thlen dawn lo: Nirmala Sitharaman

Union finance minister Nirmala Sitharaman-i chuan nimin khan thuchhuah siamin, UPI hmanga Rs. 2,000 chunglam dawr thil leina transaction-a chhiah thar lak tura sawi 'Merchant Discount Rate' (MDR) hi sorkar chhiah, cess emawi surcharge emaw a ni lo tih a sawifiah. Hei hian mipui leh consumer-te chungah harsatna leh phurrit engmah a thlen dawn lo tih a sawi.

Sitharaman chuan he sum lakkhawm hi sorkar Consolidated Fund-ah a luang lut dawn lo tih sawiin, NPCI leh bank-ten heng digital payment service petute inkar an tihchangtlunna tur a ni, a ti. October 15 aṭanga hman ṭan tur, MDR framework-ah hian Rs.2,000 chunglam merchant payment-ah 0.4% MDR lak a ni ang a, hei pawh hi dawr neitute leh bank-ten an pek tur a ni. Mipui zingah Rs.2,000 chin, P2P chu a thlawn vek a la ni zel dawn a ni.

Finance Minister chuan opposition party-ten fuihphawrh leh dik lo taka mipui bum an tumna chu demin, debit leh credit card-ah pawh MDR hi mipuite chawitir a ni ngai lo ang bawkin UPI-ah pawh a thleng dawn lo a ni, a ti.