Priyanka Gandhi-i'n CEC Gyanesh Kumar hrem a phut

Congress hruaitu leh Wayanad MP, Priyanka Gandhi Vadra chuan Election Commission-a thil thleng mek chungchangah Chief Election Commissioner (CEC) Gyanesh Kumar chu dan bawhchhiatna lian tak thlen tirah puhin, thiam loh chantir leh dan anga hrem tura hma lak a phût. Election Commission-in tum reng vanga dik lo taka mi vaibelchhe 13 vel hming electoral roll aṭanga a nuai bo chu India ram democracy kalphung tichhetu leh ram rawngbawlna phatsanna a ni, a ti.

Priyanka Gandhi chuan Ningani khan Kozhikode-a chanchinbumite a kawmnaah, “Mipui duhthlanna leh inthlan kaihhnawihah dik lo taka thil tih hi ram phatsanna nen a thuhmun a ni. Lok Sabha leh Assembly inthlan lo awm tura mipui dikna chanvo rahbeh a ni hi democratic leh constitution kalh a ni a,hetianga inthlanna dik lo kalpui chunga CEC dinhmun chelhtu chu danin a humhim bik tur a ni lo,” a ti bawk.

Sawizawmin, CEC Gyanesh Kumar chuan he thil hi a thlen tir a ni tih hre reng chungin a namnul a, a thawhpui Election Commissioner-te pawhin he thil hi duh lohna neiin kum tir aṭang khan ṭum 14 lai duh lohna an lo lantir tawh niin a sawi. Mahse, engah mah ngai loin dik lo taka inthlan a remtih avangin thiam loh chantir a, dan hmanga hremna khauh tak pek a phu hle thu a sawi.

Tarlan danin, Election Commissioner Sukhbir Singh Sandhu leh Vivek Joshi te chuan Special Intensive Revision (SIR) hnuaia roll aṭanga hming nuai bo dan kalphung leh thutlukna siam a nih dan chungchangah duh lohna leh zawhna khauh tak an lo thlen tawh a ni.

Congress bakah Opposition party hrang hrang te chuan Election Commission chu rin tlak loha ngaiin, CEC Gyanesh Kumar chu bang tur leh, a hmalak dan chungchangah thiam loh chantir an phut.