Congress-in SIR kalpui mek Amit Shah-a'n voter a paih tirna tiin sawi

Eptu party, Congress party chuan ramchhunga electoral roll ennawnna kalpui mek, Special Intensive Revision (SIR) chu union home minister, Amit Shah-a'n voter a nuaibo tirna a ni tiin an sawi. List ennawnnaa vote tam tham tak paih a ni ṭhin chu ram danpui, Constitution beihna a nih thu an sawi bawk.

Congress general secretary in-charge communications, Jairam Ramesh chuan SIR thawh thumna kalpui mekna, state leh Union Territory-ahte electoral roll-a chuang zingah, voter hmun thuma ṭhena hmun khat dawn chu paih leh, paih mai tur dinhmuna ding an nih thu a tarlang. 'List aṭanga hming paih hi 17% chunglam an ni a, hei bakah voter vbc 5.43 chu an document-te a chiang lo nia sawiin roll-a chuang tur chuan document dang theh luh belh tura hriattir an ni bawk. Heng mite pawh hi list aṭang paih mai hlauhthawnawmin an awm a ni," a ti.

Ramesh chuan state 12 leh UT pahnihah SIR kalpui meknaah, voter vbc 36.06 awm aṭangin vbc 6.18 paih an ni tih a sawi. A hmaa list ennawna thawh hnih kalpui tawhah khan voter vbc 7.8 paih an ni tawh bawk a ni. List aṭanga voter paih vak hian economy leh khawtlang nunah thleng nghawng a neih thu a sawi a, state tam zawkah chuan roll aṭanga paih hi mipa aiin hmeichhia an tam zawk tih a sawi bawk.

Congress party hruaitu chuan Election Commission pawh sawiselin, list aṭanga paih theih dinhmuna dingte chu a hmain mipui hriat turin a puangzar lo a, Delhi bikah chuan mipui lam nawrna avangin September 19 khan a tichhuak a ni, a ti. SIR-ah khua leh tui dik tak an ni ngei tih finfiahna tura document an dilte chu state-a pek chhuah ngai lohte an ni a, hei hian mipuiah phurrit nasa tak a thlen phah tih a tarlang. "A dik takah chuan SIR hi Amit Shah-a'n a tirh vanga voter tam tak nuaibona a ni. Kan ram danpui beihna a ni," tiin Ramesh chuan a sawi a ni.