SC-in Sorkar laipui leh CBSE hnenah 'three-language policy' hmang rih lo turin ngen

Central Board of Secondary Education (CBSE) hnuaia pawl 6 zirlaiten ṭawng pathum, a bikin tualchhung ṭawng pahnih tela zir ngei ngei tura ruahmanna 'three-language policy' chu tuna zirlai tan kalpui thut loin, kum 2027 aṭanga hmang ṭan zawk turin Supreme Court chuan sorkar laipui leh CBSE-te a ngen.

Chief Justice of India (CJI) Surya Kant kaihhruai bench chuan, kumin zirlaite tan kum tawp nan thla li chauh a awm tawh hnuah rilru pe taka ṭawng thar zirtir a nih chuan zirlaite leh an chhungte tana phurrit niin, harsatna a thlen theih zawk thu a sawi. Supreme Court chuan harsatna a thlen loh zawk nan kumin batch tana compulsory nih tir loin, optional turin interim period atan a rawt a, January 1, 2027 aṭanga kalpui zawk tura an duh thu court chuan a tarlang.

Justice Joymalya Bagchi chuan "Zirlaite thawk leh khata nawr thut loin, 2027 aṭanga bul ṭan a nih chuan nu leh pa leh zirna in te tan inpuahchahna hun ṭha a awm ang," tiin a sawi. Sorkar laipui aiawha ding additional solicitor general Aishwarya Bhati chuan Court thuthlen leh rawtna hi sorkar laipui hnenah ngaihtuah nawn turin a thlen tur thu a sawi ve bawk.