WBengal SIR appeal-na nuai 37 chuang Tribunal-ah la tang

West Bengal-a electoral roll ennawnna, Special Intensive Revision (SIR) kalpui a nih ṭuma paih leh telh thar tura ngenna lutah, ngenna nuai 37 aia tam chu tribunal hrang hrang 19-ah a la tang mek tih Election Commission of India (ECI) chuan Supreme Court a hriattir. Inthlanpui leh Municipal election inthlante a hnaih chhoh mek laiin heti anga ngenna tam tak a la tangkhang hi state chhunga vote nei mipuite tan buaina a thlen a hlauhawm hle.

ECI-in Supreme Court-a affidavit a theh luhah, West Bengal district 24 chhung aṭangin vote ziah luh thar tur leh paih chhuah tura ngenna, appeal tling khawm zawng zawng hi 38,20,683 a tling a ni. Heng zinga 1,02,231 chauh hi tribunal 19 te chuan an buaipui fel tawh a, appeal 37,18,452 chu buaipui lohin a la tang mek a ni. Supreme Court-in heng appellate tribunal te a din aṭangin thla ruk a liam tawh a, mahse, thil tih fel zung zung a la harsa zui zel a ni.

Petitioner-te aiawh ukil-te chuan appeal nuai 38 chuang zinga nuai 7 chauh hi voter roll aṭanga paih, telh leh tura ngente an nih thu a sawi. A bak nuai 31 chu ECI bakah mi hrang hrangin vote paihsak tura an tihte a nih thu a tarlang. Supreme Court chuan heng ngennate hi uluk taka enfiahin, vote paih tawh te'n an nihna diktak tarlanna appeal te chu ngaihpawimawh hmasak ber an nih leh nih loh enfiah turin election commission chu a ti zui bawk.