Ramchhung damdawi dawr zawng zawnga CCTV dah rawtna siam

Union Health and Family Welfare Ministry chuan Drugs Rules, 1945 tihchangtlunna tur leh damdawi Schedule H, H1 leh X khuahkhirhna a awm theihna tura dan siamremna hnuaiah, ramchhunga damdawi dawr zawng zawngte chu CCTV dah vek turin rawtna a siam. Rawtna siam hi ramchhunga damdawi dawr prescription drugs zawrhna dawrte a him leh him loh uluk zawka vil theihna tura tih a ni.

Damdawi dawr tina CCTV hman hian damdawi zawrh leh hralh kawnga langtlang leh vilzui zel chunga vantlang hriselna himna tihchangtlun chu a thil tum ber a nih thu ministry chuan an tarlang. Draft notification September 9-a tihchhuahah CCTV video data-te chu a lo berah thla thum chhung tal dah ṭha tura tih an nih bakah, he danin a huam chin turte chu sawiselna leh dodalna an neihte chu ni 30 chhunga hriattir turin a ti nghal bawk.

Hetih laiin All India Organisation of Chemists and Druggists (AIOCD), ram chhunga damdawi lam siamtu aiawh chuan sorkar chu a hma lak tumna ngaihtuah nawn leh turin an ngen. AIOCD president JS Shinde leh general secretary Rajiv Singal chuan an hnuaia chemist nuai chuangin mipui vaibelchhe 140 dawn tana nitin mamamwh damdawi an siam chhuah ṭhinah thil pawi lian tham a thlen tlem thu an sawiin, sorkar hmalakna chu kalpui lo turin an duh thu an tarlang.

Ministry chuan he rawtna hi Central Drugs Standard Control Organisation (CDSCO), Drugs Consultative Committee (DCC) leh Drugs Technical Advisory Board (DTAB) te puihnain a buaipui mek a, hemi chungchangah hian rawtna thar pawh lak mek a ni.